決定離婚
2009-11-24 21:17愛情好簡單，兩個人互相吸引，為對方心跳、思念，然後手牽手，相處愉快，親吻，再徹底把彼此的身體和心靈融和，愛得義無反顧。
結婚呢？以前倔強相信，只要兩個人愛得深、只要不是第三者，便一定會天長地久。
人愈大，漸漸明白婚姻不一定是兩個人能夠完全掌握，當妳/你跟對方的父母、家人、朋友等的相處出現問題時，原來已足夠摧毀一段美好的婚姻關係。
相處，父母也好、兄弟姊姊也好、朋友也好，一切得看緣份和技巧。與雙親的溫馨親密相比，姻親難免索然寡味。婆媳關係，兩個女人的微妙世界，女人，最懂得傷害女人，這種關係一旦演變成戰爭，註定玉石俱焚。
最近，閱讀了一篇討論區的留言，女主角知道老公經常瀏覽香港某大討論區，所以便在那裡寫下自己決定離婚的心路歷程，並叮囑他不要嘗試再找她了。字字率真，句句眼淚與無奈，也令旁人看得憤怒與婉惜......
我嫁比我老公已經7年，一直都好矛盾，老公對我好好，但我奶奶對我好衰，結婚之前同奶奶無咩見面，見親都係一兩個鐘食飯，過時過節我都有比禮物或現金佢過時過節，一直以為自己已經做得好足，就算唔係100分都有80分，家底方面大家都係公屋出身，我本人係中文學畢業，老公唔適合香港教育制度，要過澳洲讀，大家總之唔會有學歷溝通問題，而且我先生大我幾年，結婚都有經濟基礎，於是就走在一起。
結婚初期要捱層樓，我地兩公婆都無怨言，生活辛苦D，但都叫自己有個家，我先生返OFFICE工，我就返CS，要ON SHIFT，我唔能夠日日都煮飯，我老公會自己食，我以為我地會無咩問題，點知原來我奶奶好唔滿意，最初佢都只係叫我教書，又或者找份OFFICE工，唔好做CS，咁老實，唔係個個都有本事食教書行飯，OFFICE工我剛畢業的時候真係唔高人工，我地供樓，又要各自比家用屋企，真係唔得，我以為溝通就係力量，傾過，奶奶好似無野咁哦左，點知佢同D親戚講話我駁嘴，鍾意賣笑，不如做雞，成日同D男人係度笑，點知會唔會對我個仔唔住，我得一粒仔，佢唔可以對我個仔唔住，搞到過年、大時大節男家D親戚都唔同我講野，又或者黑口黑面，有D好心既會叫我轉工啦，唔好同D男同事行咁埋。
我以家勾佬咩﹖我無，我只係做CS，做CS唔笑唔通喊呀﹗我知道之後，個時又後生，同老公哭訴，老公見我咁，返去同奶奶傾，奶奶喊哂話無，係D親戚自己亂講，又話係誤會，我先生好難做，只係叫奶奶以後講說話小心D，亦提醒左奶奶，我係佢媳婦，我無面，奶奶都無面。大家以為無事，點知，之後就麻煩，我奶奶成日打我手提，我返工唔比帶手提落場，佢就話我唔聽佢電話，要媳婦等於無媳婦，死左都無人知，又打去同我上司講代我辭工……個一日，我同我老公第一次嘈到分房，佢有打去同奶奶講，但奶奶就喊哂話心疼個仔無飯食，又話我唔癡家，係好人家個女都會做教書，讀完大學都唔教書，讀咩大學……跟住就踩我出身，我單親家庭長大，佢話我阿媽連我阿爸都唔要，點可能教得好個女，我係次貨，唔會正常……
打到呢度，真係忍唔住喊
喊完，打埋落去。
個次之後，我老公雖然無出聲，但都開始左久唔久會SEND某某公司請SUPERVISOR的請人廣告比我，我都知道佢想我轉工，後來我有坐底同佢傾，佢同我講話當就下老人家，而且星期日我地兩公婆都可以拍下拖。後來我掙扎左好耐，我知道自己唔適合OFFICE的刻板工作，但為左我先生唔難做，加上我媽媽的開導，我決定挑戰下，可能WORK呢，無試過邊個知呢﹖可能我都合適……跟住我開始左我好唔開心的辦公室工作，雖然我適應到份工，但日日都係個D野令我覺得精神好疲倦，而且亦唔可能日日早過八時收工，公司炒左人又唔請，我地一個人要做兩個人野，日日都係咁OT，同事個個都係八九點先走，我奶奶又話我工作能力有問題，有咩可能係咁，又話我根本唔癡家，又話我逃避做家務……我老公幫我頂過一兩次，之後都開始話我要早D收工，佢仲早過我回到屋企，我真係盡力做，我上司有眼睇，我升左職加左人工，但自己好唔開心，我老公仲開心過我，我又覺得是但啦，最緊要係我地兩個頭家開心，點知因為升職我奶奶又話我年資咁短都升，家嫂你個上司係男人黎嫁﹖
我當眾被佢咁話，塊面都紅哂，好嬲，但咁多人又唔可以喊，我份人又唔識幽默，只可以迫個笑容出來答佢：上司唔係男人就係女人架啦，同埋我咁平凡，人地都睇我唔上眼啦。點知佢又黑面，當住我老公的家姐姐夫話我唔話得，話兩句都駁嘴，邊個教我架，仲話升職，你個位都唔知點得返黎﹗
我好想走，拎住個手袋，我老公就係咁在桌子底下按住我隻手，示意我忍，但佢又唔出聲駁奶奶，事後我一落街就喊，想返阿媽度又怕阿媽擔心，我老公就追住我，係咁話：阿媽係咁架啦，你唔好喊，忍下無事，我地個個都係咁。我都有答我老公：我做錯咩，以家我做錯D咩，我只係嫁左比你，我都有阿媽生，你阿媽想點﹗你阿媽點解咁唔鍾意我，我有做錯佢可以講，我肯改，點解佢只係咁樣侮辱人﹗
我老公解釋：你無做錯野，我肯獨仔，我阿媽覺得你搶左我走，佢之前都係咁話我D女朋友，唔係針對你，姐夫都係咁忍佢，你唔好咁啦﹗我仲嬲，先生，你之前又唔講你阿媽咁樣對你D女朋友﹖知我真係唔嫁比你﹗姐夫忍唔代表我要忍，合理的小問題我覺得忍讓老人家係應份，但咁樣我忍唔到，我都係人，我阿媽生我出來係鍚我，唔係等我比人侮辱，我咁樣都忍，我點對得我阿媽住﹗
我老公當時係咁答：「姐夫都肯為左我家姐忍，你點解唔可以﹖」
個次之後，我地兩公婆冷戰左好耐，我奶奶繼續同其他親戚數我，話我阿媽唔識養我，咁瘦，生仔實生死佢，又話驚我無仔生，又話我只係香港D大學出身，點配得起佢個仔係外國讀書返黎，D親戚又衰，成日打來同我老公講，叫我孝順下奶奶，唔好咁自我，唔係無左阿爸就大哂，唔係人人都要同情我，但我從來無同佢地D親人講我無爸爸，我亦無係公開場合有任何言論話無左爸爸引致唔開心，分明係奶奶又唱我，咁我老公都唔鍾意，因為我老公好要面，因為咁，佢主動同我示好，我地兩公婆又坐底傾，我要求唔想成日去奶奶度食飯，過時過節先去，我先生同意，認為見少D會少D是非。我同我先生都好珍惜頭家，因為我地係捱頭家返黎，由最初咩到無到以家似模似樣，點會唔珍惜﹖我少去左，我奶奶當然唔高興，話我唔尊重佢，我老公會答我工作好忙，我奶奶會打比我無理取鬧，以家咩位咁巴閉，我個仔做到經理點忙都有時間同我食飯，你都只係個主任仔……我聽左唔開心，但都履行自己同老公的諾言，唔好出聲，等佢嘈完就算。
點知，因為奶奶成日係度嘈，成日打比我，我已經向奶奶表示左有咩等我收工講等等，我奶奶都係咁，我關機佢就打比我老公，我地兩公婆又嘈，嘈得多傷感情，我老公就有第三者介入，個時係我地結婚第五年，亦係我為左我老公好唔開心咁做左份OFFICE工第三年，我已經覺得我老公好多野唔對路，我同佢暗示過幾次，如果係有，你現在認，我地共同面對，婚姻仲有轉機，我老公死都唔認，後來有次被我發現左證據，真係火都黎埋，就同老公講：我地離婚。老公喊哂話只係玩下，唔係對個女仔認真，亦講左佢覺得夾係我同佢阿媽中間好大壓力，佢話知道我盡左力，亦明白佢阿媽好煩，佢話以後你唔洗理我阿媽，就我地兩個人從新開始。
我有感動，但又覺得佢的承諾唔會兌現，我老公好孝順，同埋佢地成家人包括老爺都好就奶奶，奶奶惡慣，點會真係無事，之後實出事，但見到個老公咁，我個心十五十六，但我奶奶知道我地出左問題，竟然同我老公及其他親屬講：「一定要離婚，講真，婚姻出問題點會係得一個人責任，佢肯早D返屋企煮下飯，我個仔就會聞到人地飯香，佢根本都唔癡家，佢仲係個細路仔咁，邊知度一頭家重要呀﹖今次我個仔就比左個教訓佢，睇佢以後真敢唔敢掛住同其他男人哈哈笑笑。」
我覺得，我好絕望，我同我老公好恩愛，好愛對方，但唔可以愛到唔要自義，我為左我老公，唔做自己鍾意的工作，奶奶當眾侮辱都要忍，過時過節我咩都做足，我只係因為做你地要求的工作而煮
我開始有自殺的念頭出現，返工開始無心機，後來我知道咁落去，我真係會出事，我終於回去同我阿媽傾，我媽媽聽個時無喊，仲安慰我，又話男人孝順好難得，第日老左唔會對老婆差，想清楚先啦，奶奶有幾多年命，你點都長命過佢，你都盡左責任，咪唔好再自責唔開心，喊完再做人，同老公傾下先啦，實有方法解決，我阿媽仲叫左我老公黎，我老公跪底求我，以後唔去奶奶度食飯，咩都唔洗去，我地兩公婆好似以前咁，由咩都無再一齊捱好唔好﹖
我好感動，我地一切返，初頭好開心，但之後一切又重覆返，奶奶找唔到我，或我唔到佢家，佢找上我公司，我轉工，佢找我阿媽，又煩我老公，我阿媽好堅強，仲以為可以同我奶奶講下道理，點知喊住返，我覺得自己好無用，讀大學都係想阿媽以後生活好，自己又可以有頭家，細個無的咩都有返，人生存都係想開心，我以為會好開心，但原來唔係，咩都無，老公根本CONTROL唔到奶奶，我同奶奶有試過傾〝但奶奶根本唔係傾，佢係鬧我，話我搶左佢個仔唔識照顧，我都有駁，如果經濟許可，我都想好似奶奶咁做家庭主婦，但唔得，佢就話：你以家即係話我個仔無本事﹗你嫌佢，佢都未嫌你又樣衰又矮又面青又瘦……總之好多難聽說話，我覺得我好無用，唔知做人為咩，係我累到阿媽比人鬧，我無本事，人生好灰，好想死，一次又一次，真係好想死。
我曾經想過請工人，但商量之下原來老公唔鍾意多個人在家，無小朋友請又覺得好無謂，我地兩公婆日日去唔同餐廳食飯，雖然平平地，但都就咁一餐，一日就咁過，其實好幸福，星期日煮下飯仔，好溫馨……但我好唔開心，同人講，講得多都口臭，同老公講佢好為難，我媽媽為左我咁成日喊，朋友個個都有意見，但最終，我自己要下決定。
老公，我知你有睇呢度，你今日返到屋企，唔見我D野，我知你會好驚，但唔洗驚，亦唔好麻煩我媽媽，佢咩都唔知，我已經搬走左，我要落呢個決定真係好難，我真係好愛你，亦好珍惜所有野，我唔係因為你有第三者呢件事仲唔開心而要離開你，係因為我都自愛，我要救我自己，我想我以為會開開心心做人，我唔想成日喊，如果愛你就一定要忍你媽，咁對唔住，可能，我真係唔夠愛你。
評論
呢個女主角真係好堅強
如果話做人新抱要忍，甘呢個所謂愛自己嘅老公又做過d咩呢？
甘嘅關係，根本一早已破壞佐呢斷婚姻！
再且，男人的第三者，話咩壓力，根本係爛
如果話做人新抱要忍，甘呢個所謂愛自己嘅老公又做過d咩呢？
甘嘅關係，根本一早已破壞佐呢斷婚姻！
再且，男人的第三者，話咩壓力，根本係爛藉口。我地女人都有壓力，但我地可以搵朋友、搵親人，甚至搵同事傾，點解我地晤會甘容易去搵第三者？正所謂牛晤飲水禁晤得牛頭低。
而且係"怕媽媽"的類型（無主見、晤識解決問題）。離開呢個男人，正確
比著我一早就走左, 呢個根本就唔係男人黎, 明早自己個呀媽不對也不保護自己老婆, 呢啲死老野唔該唔好係到獻世
最離譜係多多藉口去搞女人!
我相信此不幸太太一定會找到幸福, 而呢名死老野將來一定要落油鑊!
呢位女子好厲害，忍咗咁耐...我自問冇咁既能耐
祝福佢早日找到自己的幸福。
其實佢老公都無企過係佢老婆個面，得唔到另一半support，一段婚姻好難繼續下去......
比著係我，我真係一早就唔忍LA
如果個男人係愛個女人O既，就唔會比自己個阿媽咁對人
比著係我，我真係一早就唔忍LA