婚享同學會


可用已有生活易帳號

登入


未有生活易帳號?

立即註冊

你可能也喜歡…

當前第 2 個 | 共 55 個BLOG      上一個 | 下一個
查看BLOG | 返回BLOG列表

|過大禮|平靚正海味大作戰

15日前
離過大禮得返一個月, 係時候開始準備。
一開始我已經要求男人其他野可以唔駛佢操心, 但最基本, 過大禮呢部份係要佢自己負責, 我最多從旁協助。我覺得, 依家你娶老婆, 其他野都算, 至少有一樣, 你應該自己做功課主導返, 呢個係責任感的問題。

日前, 男人已經自己做功課在元朗訂了椰子禮籃套裝, 不過佢求救話佢對海味真係無從入手, 怕被當水魚劏又怕買著D我媽唔鍾意既野, 之後就話不如俾舊錢我媽, 叫佢自己執, 而居然, 我媽反而拍手叫好。

結果, 尋日我媽就捉埋我一齊去揀海味。
之前同大妗開會時已經同阿媽有左共識: 
4式海味 只需元貝. 花菇, 罐頭鮑同髮菜
意頭意頭之嘛, 最重意平時自己又經常可以簡單食到。

第一站, 先去了平常性價比極高的樓下

嘩嘩嘩, 一入門口就見到, 個盒駛唔駛咁誇呀, 成個匯豐標誌喎
再望價錢, 嘩嘩嘩, 無事呀, $16888!??? (太震驚, 震驚到唔知咩反應好)
再周圍睇下, 哦~~~原來都有唔同價位既套餐

但仔細睇, 其實入面既內容都雞雞地喎, 唯一優點係買海味籃會送埋椰子籃同禮金盒, 啱哂D懶到出汁/勁忙既人, 一口價, 一次過買哂所有野。
離開樓下, 就開始四圍格價。

大家再睇落去之前, 有幅圖好重要, 大家最好先有個概念

我第一次咁認真買海味, 以前都係跟住阿媽衫尾負責抽野果個
但買海味學問真係好高深, 先唔好講識唔識得分舊瑤柱靚唔靚, 剩係講重量單位, 已經聽到頭暈。每間舖用既單位都會有少許出入, 有些用磅計, 有些用斤計, 真係間間都唔同。
所以, 奉勸各位, 買海味前, 先有要個概念, 切計呢兩個單位換算:
1斤 = 16兩
1磅 = 12兩

講返四圍格價, 全程基本上都係媽媽出面傾, 我負責用簿仔抄低價錢

格完價, 最後都返左東西行。
原因一: 貨品最齊, 我地要求既所有野佢都有
原因二: 佢做緊85折
原因三, 亦係最主要原因, 因為佢

一見即刻心心眼, 樓下果個誇得濟, 其他舖又無禮籃, 要自己預備, 但呢度已經有個現成靚仔禮籃, 內容仲可以自己執, 執乜都得, 想點執都得, 自由度勁高, 佢又俾我依家訂, 過大禮前一日先黎攞, 咁樣就唔怕個85折過多個星期又無左。

而最煩的係, 媽媽嫌一斤裝太多, 半斤裝又嫌太細盒唔得體, 最後我地係每樣散執, 用中型盒, 大方得體。
最後執左
花菇 12兩X2盒 = $510

髮菜 2兩X2包 = $224
車輪牌罐頭鮑 X4罐 = $1728
元貝 10兩X2盒= $1398

揀完四式, 見男人俾既海味基金仲有錢剩, 即時可以upgrade變六式
所以再揀埋
花膠 6兩X2盒= $1641
(由於盒子同花膠的size關係, 個sales姐姐拎左一大袋出黎俾媽媽自己揀, 佢即時入盒封盒, 再計重量)

原本最尾一樣係揀左蠔豉, 但諗諗下, 男人會前一晚攞, 一來要提醒佢要放雪櫃好麻煩, 二來更怕佢第二朝唔記得由雪櫃拎返佢出黎, 咁咪由六式變五式!?咁風險太高了!!!
所以, 最尾我自己揀左我本人最鍾意食既蟲草花, 貪第時我自己用黎蒸雞煲湯都用得著。

總價$5677, sales姐姐仲要好醒目咁提議不如買兩個膠袋, 湊夠$5678好意頭, 媽媽聽到即刻叫好。 

就係咁, 行到腳跛的海味格價之旅完結。下星期再去奇華訂餅, 就可以坐等過大禮LU
去到呢度, 終於都有即將結婚既實感, 有點緊張呢~


如果大家喜歡我的blog, 歡迎留個腳印或留個言喔~^^~

由於我真係太懶, 唔想逐個覆, 所以決定開名, 我個海味籃最後係南北行買, 媽媽話佢成日做減價, 大家可以行開留意下。

10213 次閱讀 | 71 個評論
Facebook WOW Google+ Weibo Mail
當前第 2 個 | 共 55 個BLOG      上一個 | 下一個

評論

 71 123

您需要先登入才能繼續本操作