婚享同學會


可用已有生活易帳號

登入


未有生活易帳號?

立即註冊

你可能也喜歡…

當前第 3 個 | 共 611 個BLOG      上一個 | 下一個
查看BLOG | 返回BLOG列表

小女的成長故事 - 4;8

標籤孩子成長  14日前
仲有幾日就4歲8個月 好快就5歲 時間真係過得好快 但仲未見到可以甩身嘅曙光

唔知老師改簿鬆手咗定點 最近啲功課幾乎係冇圈圈或糾正筆劃 但唔等於佢拎到3個印仔 不過少咗圈圈大家冇咁難受 不過阿女開始唔想寫字 話自己唔識寫 又話攰 我唯有安慰佢話 今日唔識 聽日會識呢 然後俾好多提示佢寫好個字 都唔強求佢學一日個字就會寫得好好 同埋老師之後都會教番佢地寫 我見之前寫得唔好嗰啲字而家都寫得好好冇問題 另外就係開學時明明寫字好大力 呢輪唔知做乜做軟皮蛇 但未去到氣弱浮絲嘅程度 由佢

然後我自己教佢寫自己個名 之前學緊中間個綺字 佢玩嘢 話係咪耳字 你鍾意就改名啦 跟住前幾日佢自己攞畫板寫自己個名 連第三個字都寫到 唔係靚但啲手手腳腳齊晒 又聽到佢一路寫一路有口訣 唔係我教佢講嘅 我問佢係咪面試班老師教 佢話係 真係感動 43筆嘅名都可以咁快識寫 等媽媽唔駛內疚同你改錯名

以前已經提過 我女細細個係死都唔玩煮飯仔 完全冇興趣 最近我為咗細佬攞番晒出嚟 我女就好高興玩咗幾日 又話做媽媽 又話做侍應 最叻係攞本書做托盤 上面擺幾隻杯 話係奶茶同檸茶喎 好明顯去茶記去得太多 XDDD
媽媽好開心份玩具冇嘥到 又可以玩返幾年

另外買咗份教coding嘅玩具 我女好鍾意 幫佢改咗名做kissel (我都係拼出嚟) 因為份玩具可以自己加入故事元素 我女就好受落 成日作故仔要個機械人去呢度去嗰度 不過coding佢就未識啦 因為方向感都係一個問題 個機械人塊面轉嚟轉去 佢未識就番機械人角度決定左右 慢慢來吧 

然後而家逢星期三都可以同同車站嘅同學仔去公園玩 嗰個同學仔仲有個表妹細一年 三個小妹子喺公園玩得好開心 然後婆婆尋日話我聽 話我女見到同學喊 識得行埋去攬住佢安慰佢 希望佢真係知道咩係朋友唔好再當同學係玩具...

仲有樣進步係而家會主動話我聽學校發生嘅事 不過都係喺度講是非 教學嘅免談

做家姐都做得唔錯 叫佢幫手睇下細佬 佢都會主動同細佬玩 不過有時都係當細佬係玩具捉住佢啲手腳嚟玩 前幾日我好眼瞓 攤喺地墊度 細佬當然又要嚟黏住 然後阿女就話「媽咪要瞓覺,唔好嘈住媽咪」一秒感動 然後由於佢搞唔掂細佬 我都係要爬番起身湊佢

而家要處理嘅 就係佢喺學校同校車係咪乖番晒 唔好再玩到咁癲please






62 次閱讀 | 11 個評論
Facebook WOW Google+ Weibo Mail
當前第 3 個 | 共 611 個BLOG      上一個 | 下一個

留下足跡

評論

  • Bowing 13日前
    maviso: 可能你家公子玩同時,大女又來玩一手。
    諗諗下都係,我仔家下用腳踩琴,前幾日至鬧到佢上天花版,
    佢個妹對玩具已經夠暴力。
    我女都視地上嘅書同玩具如無物.....我隻腳都係 有幾次係直接踩我隻小腿路過 超痛 鬧到佢飛起
  • Bowing 13日前
    小方: 雖然阿女個名d字唔算好難,但冇諗過要佢依家就識寫自己個名,佢依家連學校d咁易o既字都寫唔好,無謂要佢寫再難o既字
    唉 都係為咗報直資先要咁早就教佢寫
  • maviso 13日前
    Bowing: 我想講...我家公子都係玩具殺手....我都唔明點解咁易爛...
    可能你家公子玩同時,大女又來玩一手。
    諗諗下都係,我仔家下用腳踩琴,前幾日至鬧到佢上天花版,
    佢個妹對玩具已經夠暴力。
  • 小方 13日前
    雖然阿女個名d字唔算好難,但冇諗過要佢依家就識寫自己個名,佢依家連學校d咁易o既字都寫唔好,無謂要佢寫再難o既字
  • Bowing 14日前
    HEIHEI: 因為自己個名難寫,我都係同阿女改個易寫既😂😂。
    最難都係個姓氏!😂😂
    我自己個姓都好難寫 但以前唔駛幼稚園就寫自己名.....而家啲小朋友好慘
  • Bowing 14日前
    牢騷王: 改錯名呢......我都覺得自己錯左....
    應該幫佢改一一算....早排佢寫上下, 我覺得寫得好好, 我話不如佢叫日上, BOO叫日下算, 咁樣唔洗太嘔血咁教識自己個名
    你個仔最尾個字 真係考起 日上 日下 日一 日大 都好
  • Bowing 14日前
    maviso: 講是非XDDDDDDD
    我仔近排都翻抄啲BB玩具,佢BB時玩來玩去都KEEP得好好,
    但一到妹妹手,家下全部用電有聲玩具都俾佢玩到規規地=_=
    我想講...我家公子都係玩具殺手....我都唔明點解咁易爛...
  • HEIHEI 14日前
    牢騷王: 改錯名呢......我都覺得自己錯左....
    應該幫佢改一一算....早排佢寫上下, 我覺得寫得好好, 我話不如佢叫日上, BOO叫日下算, 咁樣唔洗太嘔血咁教識自己個名
    我完全明白,要到小一先識寫自己個名。
    仲要寫到勁大隻!
  • HEIHEI 14日前
    因為自己個名難寫,我都係同阿女改個易寫既😂😂。
    最難都係個姓氏!😂😂
  • 牢騷王 14日前
    改錯名呢......我都覺得自己錯左....
    應該幫佢改一一算....早排佢寫上下, 我覺得寫得好好, 我話不如佢叫日上, BOO叫日下算, 咁樣唔洗太嘔血咁教識自己個名
  • maviso 14日前
    講是非XDDDDDDD
    我仔近排都翻抄啲BB玩具,佢BB時玩來玩去都KEEP得好好,
    但一到妹妹手,家下全部用電有聲玩具都俾佢玩到規規地=_=

您需要先登入才能繼續本操作