婚享同學會


可用已有生活易帳號

登入


未有生活易帳號?

立即註冊

Cerrystone的BLOG

Cerrystone的主頁 | 查看全部BLOG
自我介紹:
我是一個Wedding planner & MC,平時幫人做婚禮做得多,今次終於到幫自己做。

你可能也喜歡…

當前第 16 個 | 共 44 個BLOG      上一個 | 下一個
查看BLOG | 返回BLOG列表

九龍區4大最紅海景出門酒店大比拼(多圖)

標籤婚禮統籌  出門酒店  香格里拉  洲際  MarcoPoloHK  WHotel  2015-10-22 20:49
我係迪士尼擺酒,其實有諗過係迪士尼出門,不過女家有好多親戚要敬茶,所以打消左呢個念頭而我多數親友都係九龍人新界人,咁好理所當然的睇九龍區的出門酒店。而我自己對香港的海景有情意結,所以鎖定有海景的酒店。

今次好好彩睇左4間已經有啱心水的酒店。

我睇出門酒店房的小小心得:

  1. 一定要約日頭睇房,出門時間大多數係早上,影相時日光好重要,所以一定日頭去睇下間房可以有幾多日照入到房。
  2. 海景方向
  3. 有無客廁,早上工作人員加親友,大大話話成三十幾人,無理由要同新娘子爭廁所用。
  4. 可唔可以燒香,之前一晚多數都要做上頭,燒香是一定要的。
  5. 可唔可以撒米,出門時大妗姐會做的儀式。
  6. 唔係度擺酒可唔可以係酒店影相。
  7. 結婚當日會唔會俾多幾張房咭,果日一定有好多人上上落落,如果佢得兩張咭就一定唔足夠
  8. 晚上上房需唔需要登記
  9. 有無免費泊車
  10. 上車位影相靚唔靚

事先聲明,純粹個人觀感,每間酒店各有各好,一分價錢一分貨式,我無揀到唔代表你揀左就係無眼光。

另外你會問點解無介紹出名做出門的紅磡海逸君綽,sorry!我一向對呢間野無好感,所以連價都唔想格。詳情請睇第一段:歡迎來到我的奇妙婚禮

第一間 九龍香XX拉酒店 (價錢:6xxx+10%)
Wow友 希希大讚,我又係佢Fans當然要去睇下房。
我睇左920呎的套房,一打開門感覺唔錯,長方形廳好實用,落地大玻璃窗,外面係尖東海景位。
佢廁所無窗的,不過好大,足夠新娘子同班姊妹係度扮靚靚。
外面有小茶水間,敬茶時好方便。
另外有一個貼心位,用佢套房的客人,可以免費用佢地Executive Lounge,所有飲品小食都可以任攞,仲有個小小文書處理位,突然要印多位rundown都有地方整到,呢個係四間之中得佢有的。
唔好處係佢屬於比較老牌酒店,大堂比較陳舊,上落車位樓底矮唔靚。
  1. 日光ok,落地大玻璃窗
  2. 海景望灣仔銅鑼灣方向
  3. 無客廁
  4. 官方話唔可以,你自己暗地搞佢暗示唔會理
  5. 撒米唔可以
  6. 住酒店房已經可以任影相,連個Executive Lounge都可以影
  7. 可以俾多兩張房咭
  8. 晚上需要登記
  9. 無免費泊車,只可短暫停留門口(無記錯一架車 $180 兩小時)
  10. 上落車位普通,唔特別靚

第二間 洲X酒店 (價錢:$8xxx+10%)
呢間唔使講太多,大家都知佢係正野!
佢知你用作出門仲會介紹佢地出門套餐(大約千幾蚊),有湯丸同蓮子茶準備好左。
個廁所好大,有按摩浴缸,前一晚沖個靚涼再瞓一覺,第二日做個靚靚新娘子,外面仲要都係海景,正!
日光好好,唔係落地大玻璃窗,不過都係大玻璃窗。但有美中不足係舊式建築窗外有簷篷,攝影師拍攝時可能要就一就。
  1. 最靚海景一定係佢
  2. 無客廁
  3. 官方話唔可以,你自己暗地搞佢暗示唔會理
  4. 撒米唔可以
  5. 唔可以係酒店企定定影相,除非你晚上係佢度設宴。姐係話佢出名的靚靚樓梯同海景露台都係唔影
  6. 唔會俾多房咭,但可以預先登記出門當日上房名單,職員可以幫手放行上房
  7. 晚上需要登記
  8. 無免費泊車,只可短暫停留門口
  9. 上車唔使我講都知靚,仲有個靚靚噴水池

第三間 Marco Pxxx HK Hotel(價錢:4xxx全包,呢間係唯一一間有早鳥折扣的,早21日book就有折扣。)

首先我一入到去已經唔係太鍾意佢地的服務,因其他三間我一行去櫃檯已經有人行出來話係咪約左睇房,係酒店職員等我地。呢間check完一大輪,問東問西,之後先係櫃檯個哥哥仔同我地上去睇,我仲要聽到佢話:「咁呀,好喇!我上去喇!」,我果時已經立刻想話你咁唔情願咁我地唔睇走

第一印象唔好!

呢間個房設計有少少奇怪,一打開門係大廳,廳盡頭有個門,行入去有一條長走廊,走廊旁邊係茶水間同廁所,再行入d先係睡房,梳妝檯係屈左係果角落位。

  1. 日光普通,同洲際一樣有大簷篷阻住影相,比洲際個簷篷更大,另外玻璃窗有半身咁高,影相唔夠靚
  2. 望西環果邊海景
  3. 無客廁
  4. 官方話唔可以,你自己暗地搞佢暗示唔會理
  5. 撒米唔可以
  6. 可以影相,不過老實內部無咩靚的影相位
  7. 可以多兩張房咭
  8. 暗示晚上唔使登記
  9. 無免費泊車,只可短暫停留門口
  10. 上落車位有兩個,一個係廣東道出口(超級多人出入),一個係佢地6樓平台(向海的,可以影相)

第四間 W Hxxel (價錢:7xxx+10%)

啱啱睇果三間屬於老牌酒店,相對W會係一間比較年輕路線的酒店。
行入去感覺唔錯,好摩登感覺,而且可能係外國做法,佢有好多野都會有很傾,唔會死牛一面頸咁話唔得。
今次我睇左一間係佢地最多人用來出門的套房,大約800呎,呢種房有兩種design(一種紅色做主調、另一種係淺綠色做主調),介紹的職員帶我地睇紅色那間。

一打開門已經有一種係你喇!我搵到的感覺。
  1. 日光好好,佢係90度角落地大玻璃窗,好光猛
  2. 望西環海景方向
  3. 有客廁係大門口旁邊
  4. 燒香呢個環節,我覺得佢做得好好,職員問我地使唔使上頭,如果要就話佢知邊個時段,佢地可以調節個防火警鐘
  5. 撒米係可以,我真係估唔到竟然係可以
  6. 可以影相,係任影,個職員仲帶我地上天台泳池睇,個景又高又靚,另外佢宴會廳如果無人用都可以入去影相(有鋼琴位好靚)
  7. 可以多兩張房咭,另外預先俾名單職員可以安排上房
  8. 晚上唔需要登記,另外職員暗示可以住多幾個人都得
  9. 無免費泊車
  10. 上落車位對住海景影相唔錯

係房望返出去

睇到呢度可能大家都估到我book左邊間?
係,就係W Hotel喇~~~

不過其實佢都有地理上的缺陷,就係女家親戚飲完茶去茶樓食午飯會麻煩少少,佢樓下全部都係貴價茶樓,可能要book多一轉車送親戚去尖沙咀茶樓食飯。

間間都會有好有唔好,希望以上資料幫到大家搵到心水出門酒店喇!


12002 次閱讀 | 4 個評論
Facebook WOW Google+ Weibo Mail
當前第 16 個 | 共 44 個BLOG      上一個 | 下一個
全部(31)

留下足跡

評論

  • Cerrystone 2015-10-23 13:34
    係呀,我係book左再高一級果間Marvellous Suite,7千幾加10%,埋單8千幾到。
  • noelwingyin 2015-10-23 12:18
    我都約左下個月睇W HOTEL,想問下你呢間係FANTASTIC SUITE定再高1級個間?因為個STAFF同我講出門1定要用再高1級個間,好似成9千蚊 = ='' TKS
  • Cerrystone 2015-10-23 00:12
    love1516: hhee... 我都係 book 左 W 呀!
    Yeah!!!
    Give me five~~
  • love1516 2015-10-22 23:22
    hhee... 我都係 book 左 W 呀!

您需要先登入才能繼續本操作