婚享同學會


可用已有生活易帳號

登入


未有生活易帳號?

立即註冊

你可能也喜歡…

當前第 1 個 | 共 20 個BLOG      上一個 | 下一個
查看BLOG | 返回BLOG列表

#媽媽唔易做 沖涼必備【沖涼櫈】!附沖涼盆、浴網實試分享 By 安立媽媽

By KayunTakhei (聯絡作者) 於 2020-06-14 20:22

初生BB軟瀨瀨,好多新手爸媽都好驚抱得唔好整到佢,每日最驚險嘅莫過於係bath time!以為上咗好多產前講座,學咗點樣幫BB沖涼,到真係要沖嗰時都係雞手鴨腳,坐喺櫈仔屈住個身扶住BB嚟沖涼,真係唔好話唔攰!爸爸就粗手粗腳,媽媽就驚傷腰,萬一好似我咁有嚴重媽媽手,真係完全幫唔到BB沖涼!

呢樣嘢真係要介紹!登登登櫈:【沖涼櫈】


張沖涼櫈係我喺淘寶搵到,只係三十幾蚊人仔,真係救咗我一命!
由於我生完安立之後有嚴重媽媽手,坐月期間都係由陪月幫安立沖涼,之後就到安立爸爸同嫲嫲幫安立沖涼,但係之後安立爸爸成日放工返嚟安立已經好眼瞓,沖親涼都大喊,嫲嫲又唔係日日嚟到同安立沖涼,所以幫安立沖涼嘅重任就去返我身上。之但係媽媽手仲未好返,咁點算呢??


首先講吓,喺沖涼呢方面真係屢敗屢試。安立未出世就淘寶揀咗張換版枱連浴盆,諗住安立爸爸腰骨唔好企喺度沖會好啲⋯點知!係一次都冇試過放安立上去沖涼架!陪月姨姨驚危險,加上安立出世係冬天,將個換片枱換入沖涼房又唔方便,結果都係將個浴盆放喺地下沖⋯奉勸廁所唔夠大嘅朋友唔好買呢啲換片沖涼二合一嘅架⋯


陪月姨姨走咗之後,安立爸爸徒手幫安立沖咗一排涼,先醒起跟個浴盆係有埋呢款鯨魚型浴網嘅,一拎返嚟用真係解放雙手輕鬆晒,唔駛彎住隻手唔駛驚跣咗安立落水,但係用得耐開始起毛粒,同埋每次沖完都濕晒要晾乾,好似唔多衛生咁。


之後朋友俾咗個沖涼盆同浴網俾我哋,就用嚟試吓,藍色呢個浴盤高身啲,個形狀比較舒服,個頭仔可以枕住個盤,所以之後都冇再用白色個浴盆。但係白色個浴盆有去水位用膠塞住,放水嗰時拎走舊膠就得,藍色呢個浴盆唔好處係冇去水位,倒水要成個拎起去倒,我為免整親,所以成日嘆啲水喺度等爸爸倒⋯哈哈⋯

而黃色呢款浴網比起鯨魚形浴網快乾好多,冇咁阻訂,但係放安立上去會不斷向下跣,本來用鯨魚形嗰隻都可以拎吓毛巾,但呢款真係唔可以放開手,只係輕輕傍住,實用性不大。

因為鯨魚形浴網已經好殘,黃色浴網又唔多實用,當時安立都三個月硬淨好多,安立爸爸都話不如就咁抱佢沖算,但係我媽媽手仲好痛呀大佬點沖呀!!!所以我就訪尋吓仲有咩product可以買又用得耐啲,估唔到有張咁嘅嘢又安全又實用!


張沖涼櫈本身係有分兩個size,我唔小心買錯咗大,加上個浴盆底有一間間防跣突起,令張沖涼櫈嘅吸盤唔能夠完全啜住個盆,所以我拉高咗少少嚟用,有兩個吸盆啜住都穩陣。

安立半歲開始沖涼識得坐,但係喺不久之前,諗住佢識坐就俾佢試吓坐住沖,點知佢一個華麗轉身跣咗落水度,好彩眼明手快扶得住佢!自此之後都唔敢拎走張沖涼櫈,用咗沖涼櫈放心好多,有時安立沖完涼,我會俾佢玩多陣水同公仔,然後喺側邊刷牙同吹頭,完全唔驚佢會跌落水,因為根本冇位俾佢跌落水,當然前提係BB已經硬淨唔會歪埋一邊。

呢幾日仲發現,估唔到沖涼盆+沖涼凳除咗沖涼仲有第二個用途⋯就係媽媽去廁所同喺廚房整嘢嘅時候,放安立落去睇住,安立好似坐船仔咁好乖望住我好好奇!


另外因為成日返嫲嫲度留到好夜,嫲嫲都買咗個浴盆俾安立返去嘅時候可以沖涼,係摺疊式嘅浴盆,暫時對安立嚟講有啲大,沖咗兩次安立都驚到喊,可能因為慣咗有沖涼櫈傍住唔慣個沖涼盆咁多水。不過安立坐得再定啲,相信佢會玩水玩得好開心!

闊別呢度成三四年,諗起當時搞結婚喺度寫咗嘅文有好多人留言,分享到好嘢好開心又有滿足感,因為成為咗全職媽媽,生活有啲悶,而安立又開始大,有返啲私人時間可以寫吓嘢,見靚太club搞緊活動就拿拿聲寫返篇先~希望日後多啲同大家分享好嘢~

450 次閱讀 | 0 個評論
Facebook WOW Google+ Weibo Mail
當前第 1 個 | 共 20 個BLOG      下一個

評論


您需要先登入才能繼續本操作