秋冬風起，栗子炆雞

秋冬風起，栗子炆雞（昇爺腔上身）哈哈～

夏天我真係好少煮栗子，總覺得栗子係冬天專屬餸，又的而且確，栗子最近先在街市四方八面湧出黎，應該係當造期吧。

買左半邊嘉美雞（聲稱）$85，洗淨，去皮。

用鹽，糖，生抽，胡椒，紹酒，蠔油，醃雞最少半小時。

臨煮前加入麻油，生粉。

栗子（16粒）先放入滾水，約2分鐘，再放入冰水，然後剝殼去衣。

剝殼去衣手法－我習慣大力谷開栗子一半，塊衣就可以成塊脫落黎，反正我都會將栗子一開二，入味Ｄ。

切4-5粒乾蔥，蒜頭，幾條蔥白，以中火起鑊直至香氣撲鼻。

兜起爆過既料頭，放入炆既煲入面（最好爆炒同炆係同一鍋具，如有靚鍋具）

跟著爆香栗子，同樣爆到聞到栗子香，又兜起放入炆鍋。

最後到雞，爆炒至微黃色，兜起放入炆鍋

加入水，水量需大約覆蓋到所有材料。

加入少量麻油，老抽，紹酒，蠔油，糖，中火煮約15-20分鐘，直至見到材料經已上色，熄火，由佢自己索味。

＊呢個時侯記得試味！

食之前，大火兜炒至汁收乾，我用左3分鐘，生粉水都唔洗落，杰度非常好。

如果唔鍾意食咁蓉既栗子，中火煮栗子15-20分鐘後，可縮短索味既過程，或者最後唔好煮咁耐收乾汁，直接加生粉水形成芡汁。

有Ｄ栗子完整，有Ｄ已變左栗子蓉包住Ｄ雞，獨特既香甜栗子味無得頂，我已經又想再煮喇！